احوالات حضرت رقیه (سلام الله علیها)
بیر گونی گوشه ویرانده دورموشدی خانیم
دل ویرانده غم بزمینی قورموشدی خانیم
گلی ویرمیشدی دولی یعنی یورولموشدی خانیم
آتاسیزلیق غمی قونموشدی اونون یوز گوزونه
کنج ویرانده آغلوردی خانیم ئوز ئوزونه
ناگهان گلدی یزیدین قیزی اول زاده شر
دیدی کیمسن کیمه وار نسبتون ای در گهر
نیه گل مثلی سولوب صورتون ای نور بصر
باخوشون جانیمه اوت سالدی غمون سویله منه
سنی بو حالیده گوردیم اورگیم یاندی سنه
بله معلومیدی آی بختی گونی قاره خانیم؟
گردماتم آلنوب باشووه بیچاره خانیم؟
قلبوی تیر مصیبت ائلیوب یاره خانیم؟
توزا تپراقه باتوب ال چک او ابرولروه
بیر کسون یوخدی ویرا شانه او گیسولروه
دیدی ادیمدی رقیه من حسینون گلویم
گلشنه آل علیون سارالان سنبلویم
اکبرین خواهر خوش منظریم بلبلیم
قلبیمی جور و جفا قان ائلیوب دیده ترم
کربلاده آتا قارداشیم ئولوب خونجگرم
تا ائشیدی که حسینون قیزیدی دخت یزید
سوزدی ساخلا دیدی دختر خونخوار پلید
او حسینی که دیورسن اولوب اللرده شهید
ایستیوردی اولا رهبر باشی اللرده قالوب ؟
سویولوب پیکر صد پاره سی چوللرده قالوب؟
ویرمیوب بیعت آلین علت ا ودور قانه باتوب
ئوز سوزون ائلیوب اقرار چیخور یرده یاتوب
بله فکر ایلمه ئوز حقینه البته چاتوب
کیم باشی اندیرمسه گر آل ابوسفیانه
دهریده توشی اولاجاق محنت بی پایانه
اوزمرم من گینه با اینهمه همت الینی
ویرسن سنده اگر مهر و محبت الینی
چکمرم ال دوتارام منده رفاقت الینی
آپاروب قصره سنی حورو عزیز ایلیرم
مقدمون خوش دوتارام عالی کنیز ایلیرم
سن اگر شاه قیزیسان هانی جلال وحشمون
یاندوبدور دل هر رهگذری درد و غمون
گورمورم هیچ سنون اطرافیده اولسون خدمون
میم اطرافیمه باخ دقتیله گورسه گوزون
فرقیمیز چوخدی بوما بینیده اگهسن ئوزون
ناروا تهمتی بسکه خانیما گلدی گران
سوزی بی پرده دیوب روحینه گتدی هیجان
بسدی لال اول دیدی یوم آغزوی ای هرزه روان
ای کج اندیشه اویان آچ گوزوی حق طلب اول
یا رقییله دانیشما یا بیرآز با ادب اول
چوخ دوروب بوردامنه طعنه بیجا ویرما
قلبیمی نار غمه قان ایلیوب یاندیرما
منی وادار ایلمه صحبت چیخ گئد دورما
بونی عالمده بیلور هانسی پلیدین قیزیسان
عرشه ده چاتساباشون سانکی یزیدن قیزیسان
ویروب بیعت الینی ظلم الینه آل علی
چونکه حقدور عملینده اولارون یوخ خللی
واریری تهمت بیجا ویرانون سینسون الی
علوی مکتبی تدریس ائدر آزاده لره
ویرمیه بیعت الین تا طلقازاده لره
ایستموردیم دیم آشدون سوزی اولده ئوزون
گر بصیرت گوزون اولسا منه باخ یوما گوزون
فرقیمیز چوخدی بو ما بینیده حق دوراو سوزون
((آسمان شرفین شعشه زا اولدوزیام ))
سن یزیدن قیزسان منده حسینون قیزیام
من سپهر شرفین اختریم سن کیمسن
یوسف فاطمه نون دلبریم سن کیمسن
زینبین شامیده هم سنگریم سن کیمسن
ایستیورسن کیمی سن حور عزیز ایلیسن
آپاریب قصره اونی عالی کنیز ایلیسن
حشمت وجود و سخا و کرمیم چوخدی منیم
پنج تن بلبلویم آیری غمیم یوخدی منیم
قلبووه هر سوزومون تک تکی مین اوخدی منیم
سنه لایقدی کنیزلیق ئوزوی دوتما عزیز
گئد آنونان خبر آل گور کیمه اولموشدی کنیز
باخما قیرخ گوندی بو مخروبده زندانم من
قارداشیم اکبره خاطر اورگی قانم من
بله فکر ائلمه که قلبی پریشانم من
نیه لازمدی ویرام شانه بو گیسولریمه
هانسی قارداشی اولن ال چکر ابرولرینه
